NDRRMC #RollyPH maihahalintulad sa Bagyong Tisoy noong 2019

Sinabi ni NDRRMC executive director Undersecretary Ricardo Jalad nitong Biyernes na ang Bagyong Rolly ay maihahalintulad sa Bagyong Tisoy na tumama sa mga lalawigan sa Luzon at Visayas noong nakaraang taon.

"Base sa presentation ng PAGASA kanina, sa tingin ko parang kasing-lakas siya ng Typhoon Tisoy last year. Si Typhoon Tisoy last year, mas kakaunti 'yung casualties natin kaysa kay Ursula, 'yung sumunod kay Tisoy. Dahil dito kay Tisoy marami 'yung talagang preemptive evacuations natin," pahayag ni Jalad sa isang online press briefing.

Nag-iwan si bagyong Tisoy ng hindi bababa sa 12 patay at 54 indibidwal na sugatan. Mahigit 225,000 na pamilya mula sa Region III, V, VIII at Cordillera Administrative Region (CAR) ang naapektuhan ng bagyo.

Nilinaw din ng NDRRMC na hindi papalo si Rolly sa supertyphoon.

"Sa official na advisory sa atin ng PAGASA, ito'y aabot sa typhoon level lang, ang pinakamalakas na nakikita niya na hangin na dadalhin ay nasa 185 kilometers per hour," sabi ni Jalad.

"Napaliwanag naman 'yan ng PAGASA na ang pagkaiba ng forecast ng Hawaii at PAGASA ay dahil sa magkaiba 'yung kanilang parameters," dagdag nito.